Б.Батзориг олимпийн эрх авлаа
Азербайжаны нийслэл Баку хотноо болж буй чөлөөт бөхийн дэлхийн аварга шалгаруулах тэмцээний эрэгтэйчүүдийн 66 кг, 74 кг, 84 кг-ийн жингийн бөхчүүдийн барилдаан өнөөдөр (9.20) болж өндөрлөв.
66 кг-ийн жинд манай Буянжавын БАТЗОРИГ эхний тойрогтоо Палау арлын бөх Ф.Гиббонсыг 13:0-ээр ялаад Кубын Г.Гарзонд 3:8-аар дийлдэв. Ингээд дагах барилдаанд Иракын Х.Алитай 0:0-ээр тэнцэж, шодолтоор ялаад дараа нь АНУ-ын Д.Швабтай барилджээ. Хэрэв Америкийн бөхийг хожсон бол медалийн төлөө өрсөлдөх байсан ч 2:4-өөр ялагдаж жиндээ долдугаар байр эзлэв. Энэхүү дэлхийн аваргаас эхний наймд шалгарсан бөхчүүд “Бээжин-2008” олимпийн наадамд оролцох эрхээ авч буй тул Б.Батзориг олимпийн эрх авсан манай зургаа дахь тамирчин боллоо. Одоогийн байдлаар манай тамирчдаас буудлагын О.Гүндэгмаа, З.Батхуяг, Ц.Мөнхзул, жүдогийн Х.Цагаанбаатар, чөлөөтийн Б.Наранбаатар, Б.Батзориг нар олимпийн эрхээ “өвөртлөөд” байна.
74 кг-ийн жинд зодоглосон Доржваанчигийн ГОМБОДОРЖ нэг, хоёрдугаар тойрогт Гвиней Бисаугийн А.Мидана, Словакын И.Жагуров нарыг тус бүр 3:0-ээр ялсан ч дараа нь Унгарын Ж.Хатоштай 3:3-аар тэнцээд, техникийн оноогоор ялагджээ. Хэрэв Унгарын бөхийг ялсан бол эхний наймд багтаж олимпийн эрх авах байж.
84 кг-ийн жинд барилдсан Чагнаадоржийн ГАНЗОРИГ эхний тойрогт хийлээд, дараа нь Бразилийн А.Жаоудег 3:0-ээр ялжээ. Дараа нь шөвгийн наймд үлдэхийн төлөө барилдаанд Грекийн Лоизидаст 1:7 –оор дийлдэн тэмцээнээ дуусгажээ.
Маргааш (9.21) эрэгтэйчүүдийн 96кг, 120 кг, эмэгтэйчүүдийн 48 кг-ийн жингийн бөхчүүдийн барилдаан болно.
96 кг-ийн жинд Төмөрхүүгийн ЭНХ-АМГАЛАН эхний тойрогт гоц мөргөж, дараа нь Италийн М.Петтатай оноолт таарчээ. Хэрэв Италийн бөхийг ялбал Пуэрто-Рико, Польшийн бөхчүүдийн хэн ялсантай нь шөвгийн наймд үлдэхийн төлөө барилдах юм.
120 кг-ийн жинд Ганзоригийн ГАНХУЯГ мөн эхэлж гоц мөргөөд , дараа нь Латвийн бөхтэй оноолт таарсан. Ялбал цаашаа Азербайжаны Исаев, Польшийн Витек нарын аль хожсонтой нь учраа таарах аж.
Эмэгтэйчүүдийн 48 кг-ийн жинд гавьяат тамирчин, дэлхийн аваргын хүрэл медальт Цогтбазарын ЭНХЖАРГАЛ эхлээд БНСУ-ын Х.Кимтэй оноолт таарсан байна. Солонгосын бөхийг ялбал Румын, Азербайжаны бөхчүүдийн хэн ялсантай барилдах нь.
Чөлөөт бөхийн 2007 оны ДАШТ-ий медальтнууд
Эрэгтэй:
55кг: 1.Б. Кудуков (ОХУ)
2. Б.Наранбаатар (Монгол)
3.Э.Морено (Куба)
Р.Гажиев (Беларусь)
60 кг: 1. М.Батиров (ОХУ)
2.А. Гвидеа (Болгар)
3.Б.Базаргуруев (Кыргызстан)
С.Призрени (Албани)
66кг: 1.Р.Шахин (Турк)
2.Г.Гарзон (Куба)
3.И.Фарниев (ОХУ)
О.Тушивили (Гүрж)
74 кг: 1. М.Муртазалиев (ОХУ)
2.И.Алдатов (Украйн)
3.З.Фундоа (Куба)
Х.Вараев (Азербайжан)
84 кг: 1. Г.Кетоев (ОХУ)
2.Ж.Абдусаломов (Тажикистан)
3.З.Сохиев (Узбекистан)
Р.Яздани (Иран)
