Хөлбөмбөгийн ертөнцийн баячууд
Америкийн нэр хүнд бүхий FORBES сэтгүүл хөлбөмбөгийн ертөнцийн хамгийн баян баг, тоглогчдыг зарлалаа.Өнгөрөгч онд олсон ашиг ,орлогыг нь үндэслэн энэхүү жагсаалтыг гаргасан байна.
Хамгийн баян багууд
1.Манчестер Юнайтед Англи 1,453 сая доллар
2.Реал (Мадрид) Испани 1,036
3.Арсенал Англи 915
4.Бавари Герман 838
5.Милан Итали 824
6.Ювентус Итали 567
7.Интер Итали 555
8.Челси Англи 537
9.Барселона Испани 535
10.Шальке-04 Герман 471
Баян багийн чансааг АНУ-ын бизнесмэн Малькольм Глэйзерын эзэмшдэг “МЮ” тэргүүллээ.Мөн Дэнни Фишмений “Арсенал”, Италийн ерөнхий сайд асан Сильвио Берлусконийн эзэмшлийн “Милан”, тэрбумтан Аньелигийн гэр бүлийнхний мэдлийн “Ювентус”, Массимо Мораттигийн “Интер”, Оросын олигарх Роман Абрамовичийн “Челси” клубууд эхний 10-т багтаж байна. Харин “Реал” , “Бавари”, “Барселона” , “Шальке-04” багууд бол клубын гишүүдийн мэдэлд байдаг ажээ.
Халаас зузаан хөлбөмбөгчид
1.Роналдиньо Барселона, Бразил 30 сая
2.Дэвид Бэкхэм Реал, Англи 29 сая
3.Роналдо Милан, Бразил 23 сая
4.Уэйн Руни Манчестер Юнайтед, Англи 17 сая
5.Микаэль Баллак Челси, Герман 17 сая
6.Тьерри Анри Арсенал, Франц 16 сая
7.Зинедин Зидан Франц 16 сая
8.Фабиа Каннаваро Реал, Итали 15 сая
9.Жон Терри Челси, Англи 14 сая
10.Стивен Жеррард Ливерпуль, Англи 14 сая
Дэлхийн аварга шалгаруулах тэмцээнд тааруухан тоглосон Роналдиньо цуут NIKE фирмтэй байгуулсан гэрээнийхээ ачаар манай гаригийн хамгийн баян хөлбөмбөгчний жагсаалтыг тэргүүлжээ. “R 10” хэмээх түүний нэр бүхий брэнд болсон пүүз тун ч их орлого оруулдаг байна. “Аман хүзүүд” Английн шигшээгийн экс ахлагч , эдүгээ “Эзэн хааны” клубт алба хашиж буй,ирэх зунаас Америкт тоглох Дэвид Бэкхэм “давхив”. Америкийн MLS-ийн Лос-Анжелесийн “Гэлэкси” багтай 250 сая долларын 5 жилийн гэрээг байгуулсан Бэкс энэ жил харин “баячуудын” жагсаалтыг бараг тэргүүлэх биз ээ. Жагсаалтын гуравт “шүдэрхэг” Роналдо буйр заан бичигджээ. Хөлбөмбөгийн ногоон талбайд төдийлөн гялалзахгүй байгаа ч Испанийн “Реал”-аас Италийн “Милан”-д шилжин дуулиан шуугиан тарьсаар л байна. Тэрбээр Испани , Италийн хамгийн “эвлэршгүй дайснууд” болох “Реал”(Мадрид)- “Барселона”, “Интер”- “ Милан” багуудад аль алинд нь тоглосон өвөрмөц амжилт тогтоов. Бас өнгөрсөн ДАШТ-д 15 дахь гоолоо оруулан ДАШТ-ий түүхэнд нийтдээ хамгийн олон гоол оруулсан хөлбөмбөгч болсон билээ.Роналдо “моодноос” гарах болоогүй бололтой. Жагсаалтын дөрөвт Английн шигшээгийн болон “МЮ”-гийн 21 настай довтлогч У.Руни бичигдэв. Тэрбээр багтайгаа 2012 оныг хүртэл гэрээ байгуулсан юм. Харин Германы шигшээгийн ахлагч М.Баллак ДАШТ-ий дараа Английн “Челси”-тэй дөрвөн жилийн хугацаатай 55 сая долларын гэрээ байгуулснаар "айргийн тавд” багтжээ.Зургаад Францын Тьерри Анри бичигджээ.Тэрбээр Английн “Арсенал”-тай дөрвөн жилийн хугацаатай гэрээг үзэглэн, долоо хоногт 200 000 долларын цалин авах болсон нь Анриг “Арсенал”-ын түүхэн дэх хамгийн өндөр цалинтай хөлбөмбөгчин болгожээ.
Зодог тайлсан Зинедин Зидан жагсаалтад долоод орсон нь гайхах зүйл бишээ. Дэлхийн шилдэг хөлбөмбөгчнөөр гурван удаа шалгарсан ,Францын шигшээгийн экс ахлагч спортын хувцас хэрэглэлийн алдарт фирм ADIDAS -тай 2017 он хүртэл гэрээ байгуулсан нь түүнд ийм орлого авчирчээ. Дэлхийн аварга Италийн шигшээ багийн ахлагч,Фабиа Каннаваро манай гаригийн хамгийн үнэтэй хамгаалагч болов. Тэрбээр “Интер” –ээс “Реал”-д ийм үнэ цэнээр очсон бөлгөө.Оросын тэрбумтан ,Чукотка мужийн амбан захирагч Роман Абрамовичийн “Челси” багийн ахлагч Жон Терри баян хөлбөмбөгчдийн жагсаалтад есдүгээрт бичигджээ.2005,2006 онд дараалан Английн Премьер лиг –ийн аварга болсон “Челси”-гийн амжилт багийн ахлагчтай нягт холбоотой болохоор арга ч үгүй биз .Аравдугаар байрт Английн бас нэгэн баг “Ливерпуль”–ийн ахлагч Стивен Жеррард оров. Жеррардын долоо хоногийн цалин 180 000 доллар гэнэ.
